مسمن معمر بالكفتة و الخضر
المكونات:
لتحضير الحشوة :
300 غرام كفتة (لحم مفروم )
بصلتين كبار مقطعة مربعات
فص ثوم مفروم
جزرة محكوكة رقيق
قرعة خضراء محكوكة رقيق
فلفل حلو مربعات
كمية مهمة من القزبور و المعدنوس مفروم رقيق
ملح فلفل اسود كمون بابريكا سكينجبير خرقوم سودانية
( الشاونية ) أو هريسة
كأس شاي زيت زيتون وزيت المائدة
في مقلاة نوضعو الزيت مع الثوم و البصل يتشحر نضيفو الكفتة نفرتوها مزيان نزيدو الخضر التوابل نحركو مزيان نخليو الكل اتشحر
نطفيو النار و نزيدو الربيع. نخليو الحشوة تبرد تماما عاد نخدمو بیها باش میتقطع العجين .
لتحضير العجين :
500 غرام دقيق ابيض
300غرام دقيق الفينو او السميد الناعم
ملح والقليل من السكر
نصف كيس خميرة حلويات
ماء للعجن
في قصرية نوضعو المقادير كاملة نضيفو الماء بالتدريج میکونش رخو بزاف ندكوها شوية ونوضعوها فبلاستيك ترتاح واحد نصف ساعة
. نشكلو كويرات متساوية ندهنوهم
بالزيت نخليهم يرتاحو15دقيقة باش يسهل عليا نشكلهم و نبداو نعمروهم نطلقو كرة مزيان بمساعدة الزيت نحطو كمية من الحشوة وسط العجينة ونرشو شوية من زيت لي شحرنا فيها الحشوة نجمعوها على شكل مربع
ملي نكملو العملية لجميع الكرات نبسطو كل مربع باليد و نطيبوها من الجهتين على نار متوسطة مع رش الزيت
مره مره حتى تتحمر. و بالصحة والراحة
